Mamatqulov Abdulhamid haqida
1950 yil Sirdaryo tumanida tug‘ilgan, Guliston ixtisoslashtirilgan san’at maktabining xalq чолғуlari kafedrasi Oliy toifali o‘qituvchisi, qariyib 50 yillik ish stajiga ega.
U xalq cholg‘ulari: rubob prima, dutor bas mutaxassisliklarida yangi pedagogik texnologiyalarni keng tadbiq etishi, o‘quvchilarga saboq berish jarayonida multimediya vositalari kabi zamonaviy ko‘rgazmali qurollardan foydalanishi hamda har bir o‘g‘il-qizning iqtidori va qobiliyatiga qarab individual ish olib borishni yo‘lga qo‘yganligi tufayli o‘quvchilari viloyat va respublika miqyosidagi ko‘rik-tanlovlarda sovrinli o‘rinlarni egallab kelmoqda. U mehnat faoliyati davomida o‘zining talabchanligi, mehnatsevarligi, yangilikka intiluvchanligi bilan jamoa o‘rtasida o‘z hurmatiga ega inson.
O‘zining pedagogik faoliyati davomida ko‘plab shogirdlar yetishtirgan murabbiy, o‘z sohasini chuqur egallagan, bilimli, izlanuvchan, dunyoqarashi keng, ijodkor o‘qituvchi.
Abdulhamid Mamatkulov 2016 yil Fransiya Davlatida o‘tkazilgan “GALA NITSE 2016” tanlovida “Eng yaxshi o‘qituvchi” nominatsiyasi bo‘yicha “Svoboda, Ravenstvo, Bratstvo” medali hamda Professional o‘qituvchi sertifikati bilan taqdirlandi.O‘quvchisi Karimov Dilshod ham EURO MEDIA STAR GROUP ko‘rik tanlovi medali va sertifikatiga ega bo‘ldi.
Abdulhamid Mamatkulov 2010 yil Toshkent shahrida bo‘lib o‘tgan “Ta’lim samaradorligini oshirishda ilg‘or pedagogik texnologiyalarning roli” mavzusidagi respublika hududiy ilmiy-uslubiy seminarda “Pedagogika, musiqa va san’at kollejlariga musiqa ma’lumotisiz kelgan o‘quvchilarni 16 talik notalarni tezroq o‘rganishlari uchun oson va yengil usullar” mavzusidagi uslubiy ma’ruzasi bilan qatnashib, seminar ishtirokchilarida katta taassurot qoldirdi.
O‘zining mehnat faoliyati davomida 60 ga yaqin shogirdlarni tarbiyaladi hamda 4 nafar o‘quvchilari Xalqaro tanlovda, 6 nafar o‘quvchilari Respublika yosh ijrochilari tanlovida hamda 50 dan ortiq o‘quvchilari respublika ko‘rik-tanlovlarda yuqori natijalarga erishdi.
Shuningdek, 2016 yil Karimov Dilshod Fransiya Davlatining Parij shahrida o‘tkazilgan “Mo‘jizali Parij” nomli masofaviy Xalqaro tanlovda II-darajali diplomi bilan taqdirlanib, 2016 yil Parij shahrida o‘tkazilgan Gala konsertda o‘qituvchisi A.Mamatkulov bilan birga ishtirok etdi.
2016 yil “Navro‘z sadolari” II Xalqaro milliy cholg‘u ko‘p ovozli ansambl va orkestrlar festivalida ishtirok etib, ijro mahoratini yuqori darajada namoyish qilganliklari uchun o‘quvchilari Odiljonov Asilbek, Nurmamatov Davlat, Karimov Dilshod va Mamatqobulov Sultonlar festival sertifikati bilan taqdirlandilar. Karimov Dilshod 2016 yil “Nihol” Davlat mukofoti Respublika ko‘rik-tanlovining Sirdaryo viloyat bosqichida faol ishtirok etgani uchun 1 darajali diplomini olib, festivalning respublika bosqichida ishtirok etish xuquqini qo‘lga kiritdi.
Karimov Dilshod 2017 yil “Nihol” Davlat mukofoti sovrindori bo‘ldi.
2017 yil Sirdaryo viloyati Madaniyat boshqarmasining Ta’lim tizimidagi ko‘p yillik samarali mehnati, “Ta’lim to‘g‘risida” gi, “Kadrlar tayyorlash milliy dasturi” Qonunlarini hayotga tadbiq etishda, shuningdek yoshlarni milliy musiqa va san’atimizning noyob durdonalaridan bahramand bo‘lishlarida hamda yosh avlodni tarbiyalashdagi namunali natijalariga erishganligi uchun “Faxriy yorlig‘i”ga munosib ko‘rilgan.
A.Mamatkulov Sirdaryo viloyati o‘rta maxsus, kasb-hunar ta’limi boshqarmasi tomonidan 2015-2016 o‘quv yiliga tayyorgarlik ko‘rish bo‘yicha An’anaviy avgust kengashlarida faol ishtirok etgani uchun “Faxriy yorlig‘i” bilan taqdirlandi.
Hozirgi kunda shogirdlaridan R.Akuliev, Q.Xoshimov, B.Xo‘jaqulov, A.Alibekov, J.Saidbekov va Sh.Saidqurbonovlar ustozi izidan borib yoshlarga musiqa san’atidan dars bermoqdalar.
Yana ko‘plab shogirdlari oliy o‘quv yurtlarini tamomlab, respublikamizning madaniyati va san’atining rivojlanishiga samarali mehnatlari bilan munosib hissa qo‘shib kelmoqdalar. O‘zbekiston kasaba uyushmalari federatsiyasi Sirdaryo viloyati kasaba uyushmalari tashkilotlari birlashmasi tomonidan o‘tkazilgan “O‘z kasbining mohir egalari” tanlovining viloyat bosqichida g‘oliblikni qo‘lga kiritib, fahriy yorliq va qimmatbaho sovg‘a bilan taqdirlandi. 2018 yil O‘zbekiston yoshlar ittifoqi qoshidagi “Kamalak yulduzlari” bolalar ijodiyot festivalining Sirdaryo viloyat bosqichini tashkil etishda ko‘rsatgan ko‘magi uchun viloyat yoshlar ittifoqi “Tashakkurnoma”siga ega bo‘ldi. 2019 yil O‘zbekiston Respublikasi madaniyat vazirligi Sirdaryo viloyat madaniyat boshqarmasi tomonidan o‘tkazilgan “Ansambllar ko‘rik tanlovi“ ning Respublika bosqichida ishtirok etuvchi nomzodlarni tanlashda holisona professional darajada baholab, o‘zini munosib hissasini qo‘shgani uchun Sirdayo viloyati madaniyat boshqarmasining “Tashakkurnoma”si berildi.
A.Mamatkulov 2017 yil 8 dekabr “O‘zbekiston Konstitutsiyasiga 25 yil” esdalik nishoni bilan taqdirlandi.
2021-yil O‘zbekiston Respublikasi madaniyat vazirligi Sirdaryo viloyat madaniyat boshqarmasi tomonidan o‘tkazilgan “Sozlar sehri” ko‘rik-tanlovida viloyat bosqichini o‘tkazishdagi ko‘magi va mahorat darslari uchun “Tashakkurnoma” olgan.
O‘zbekiston Respublikasi madaniyat vazirligi tomonidan 2021 yil Musiqa va san’at sohasida yoshlarga ta’lim-tarbiya berishdagi faolligi va samarali mehnatlari hamda 1 oktyabr O‘qituvchilar va murabbiylar kuni umumxalq bayrami munosabati bilan “Tashakkurnoma” berilgan.
2022-yil 5 yanvarda INTERNATIONAL COMPETTION “SOUNDS AND RHYTHMS OF VIENNA” THE OFFICIAL INTERNATIONAL COMPETTIONS IN EUROPE tashkiloti tomonidan ijrochilik sohasida o‘quvchilarining erishgan yutuqlari uchun diplom bilan taqdirlandi.
A.Mamatqulov samarali mehnatlari orqasidan O‘zbekiston Respublikasi mustaqilligining 31 yilligi munosabati bilan 2022 yil “II-darajali Sog‘lom avlod uchun” ordeni sohibiga aylandi.
U oilada 5 nafar farzandni voyaga yetkazgan, barcha farzandlarini oliy ma’lumotli qilib tarbiyalagan mehribon ota.Farzandlarining aksariyatini o‘zining kasbiga o‘rgatdi, uch nafari o‘zidan-da mohiroq o‘qituvchi – mutaxassis bo‘lib yetishdi. Endilikda otalari bilan bir jamoada ma’naviyat va san’at targ‘ibotchisi, ko‘plab yosh san’at g‘unchalarining ustozlaridir.