2026-yil 2-sentyabr kuni Guliston ixtisoslashtirilgan san’at maktabida O‘zbekiston Respublikasi davlat mustaqilligining 35 yilligi hamda “Bilimlar kuni” munosabati bilan “Yagona Vatan, yagona xalq bo‘lib, yangi hayot va kelajak yaratamiz!” shiori ostida bayram tadbiri hamda “Mustaqillik darslari” tashkil etildi.
Bayram tadbirini maktab jamoasi, o‘quvchilar va ularning ota-onalari katta ko‘tarinki ruhda qarshi oldilar. Tadbir davomida Vatanimiz mustaqilligining xalqimiz hayotidagi beqiyos o‘rni, yurtimizda hukm surayotgan tinchlik va osoyishtalik, amalga oshirilayotgan bunyodkorlik ishlari hamda yoshlar uchun yaratilayotgan keng imkoniyatlar haqida so‘z yuritildi.
Tadbirda maktab direktori E. Shadiyev hamda maktabning tajribali ustozlaridan A. Mamatqulov so‘zga chiqib, barcha o‘quvchilar, ustozlar va ota-onalarni O‘zbekiston Respublikasi davlat mustaqilligining 35 yilligi hamda yangi o‘quv yili – “Bilimlar kuni” bilan samimiy muborakbod etdilar.
Shuningdek, tadbir davomida O‘zbekiston Respublikasi Prezidentining o‘quvchilar va pedagoglarga yangi 2026/2027-o‘quv yili hamda “Bilimlar kuni” munosabati bilan yo‘llagan bayram tabrigi tantanali ravishda o‘qib eshittirildi. Prezidentimizning yosh avlodga bildirgan samimiy tilaklari, o‘quvchilarning zamonaviy bilimlarni puxta egallashi, o‘z oldilariga ulkan maqsadlarni qo‘yib, Vatanimiz ravnaqi va Yangi O‘zbekiston taraqqiyoti yo‘lida munosib hissa qo‘shishlari haqidagi ezgu fikrlari tadbir ishtirokchilarida katta taassurot qoldirdi.
Tadbirda ishtirok etgan ota-onalar ham so‘zga chiqib, yangi o‘quv yili munosabati bilan o‘quvchi-yoshlar va ustozlarga o‘zlarining samimiy va iliq tilaklarini bildirdilar. Ular farzandlarning ta’lim-tarbiyasi, iste’dodini yuzaga chiqarish va kelajakda Vatanga munosib farzand bo‘lib voyaga yetishida ustozlarning o‘rni beqiyos ekanligini ta’kidladilar.
Bayram tadbirining yakunida har bir sinf rahbari o‘ziga biriktirilgan sinf xonalarida “Mustaqillik darslari”ni tashkil etdi. Ushbu darslarda o‘quvchilarga O‘zbekiston mustaqilligining tarixiy ahamiyati, mustaqillik yillarida mamlakatimizda amalga oshirilgan ulkan islohotlar, bugungi tinch va farovon hayotimiz hamda Vatan ravnaqi yo‘lida yoshlarning o‘rni haqida keng tushunchalar berildi.
Ko‘tarinki ruhda o‘tgan ushbu bayram tadbiri o‘quvchilarda Vatanga muhabbat, milliy g‘urur va iftixor tuyg‘ularini yanada mustahkamlab, ularni yangi o‘quv yilini katta maqsadlar va ulkan orzular bilan boshlashga undadi.